16 sentyabr kuni Innovasion rivojlanish vazirligida O‘zbekistonda ilk bor qishloq xo‘jaligi sohasida tijoratlashtirishga tayyor bo‘lgan ilmiy ishlanmalar ko‘rgazmasi ochildi. 

Uch kun davom etadigan ko‘rgazmada yurtimizdagi ilmiy-tadqiqot institutlari, ilmiy va innovasion markazlar tomonidan 200ga yaqin qishloq xo‘jaligi sohasidagi ilmiy ishlanmalar namoyish etiladi.

Ko‘rgazmani tashkil etishdan asosiy maqsad muloqotlar maydonini tashkil etish, ishlab chiqarish va ilm-fan o‘rtasidagi mavjud jarlik o‘rtasida ko‘prik yasashdir. Bu maydon olimlar tomonidan yaratilgan yangi ishlanmalarni taqdim etish bilan bir qatorda ulardagi kamchiliklarni bartaraf etish uchun ham imkoniyatdir. Ko‘rgazma vazirlik tomonidan istiqbolli loyihalarga moliyaviy mablag‘ ajratish, intellektual mulkni himoya qilishda yordam ko‘rsatish, ilmiy ishlanmaning bozor talablariga javob beradigan prototipini ishlab chiqarish, tarmoqqa tayyor mahsulotni yetkazib berish choralarini ko‘rishga ko‘mak beradi.

Tadbirda «olim-tarmoq», «olim-ishlab chiqaruvchi» o‘rtasida muloqotni o‘rnatib, ular o‘rtasidagi muammolarni zudlik bilan hal qilinishi ko‘zda tutilgan. Hozirda xususiy tadbirkorlar, klaster rahbarlari, fermerlar va olimlar o‘rtasida muloqotning kamligi bois qishloq xo‘jaligida qator muammolar yechilmay turgani kuzatilmoqda. Mazkur ko‘rgazma uni yechishga qaratilgan, deyiladi Innovasion rivojlanish vazirligi matbuot xizmati xabarida.