O‘zbekiston Respublikasi Prezidentining 2025-yil 14-fevraldagi PQ-61-son qarori ijrosini ta’minlash maqsadida 2025-yil 16-sentabr kuni O‘zbekiston Milliy universiteti Jizzax filialining Psixologiya fakulteti “Iqtisodiyot” yo‘nalishi bitiruvchi kurs talabalari uchun amaliy seminar-trening tashkil etildi.

          Tadbirda “O‘zmilliybank” AJ va “Kelajakka qadam” markazi mutaxassislari ishtirok etib, talabalarga bank xizmatlari va davlat dasturlari bo‘yicha batafsil ma’lumotlar berishdi.

           Seminar davomida talabalarga “Kelajakka qadam” dasturining imkoniyatlari, yoshlarning tadbirkorlik faoliyatini qo‘llab-quvvatlash mexanizmlari, biznes-rejalarni amalga oshirish jarayonlari haqida tushunchalar berildi. 

           Trening yakunida esa bitiruvchi kurs talabalariga Registrator ofisi faoliyati, o‘quv jarayonidagi navbat tizimi va uning imkoniyatlari haqida ofis xodimlari tomonidan batafsil tushuntirishlar ma'lumotlar berildi.

          “Kelajakka qadam” dasturi oliy ta’lim muassasalari bitiruvchilarini qo‘llab-quvvatlash, ularning mustaqil ravishda mehnat bozoriga kirib borishi, shaxsiy faoliyatini yo‘lga qo‘yishi va jamiyatda o‘z o‘rnini topishlariga xizmat qiluvchi muhim tashabbuslardan biridir. Mazkur kredit mahsuloti bitiruvchilarga o‘z biznes g‘oyalarini amalga oshirish, kasbiy faoliyatini boshlash yoki kengaytirish uchun qulay imkoniyatlar yaratadi. Dasturda imtiyozli foiz stavkalari, to‘lov muddatining moslashuvchanligi hamda hujjatlashtirish jarayonlarining yengillashtirilgani yoshlar uchun katta yordam bo‘lib xizmat qiladi.

        “Kelajakka qadam” kreditlari yoshlarning tashabbuskorlik ruhini kuchaytirib, ularni iqtisodiy va ijtimoiy jarayonlarda faol ishtirok etishga rag‘batlantiradi. Bu orqali mamlakatda yangi ish o‘rinlari yaratiladi, innovatsion g‘oyalar hayotga tatbiq etiladi hamda kichik biznes va tadbirkorlikning rivojlanishiga keng sharoit tug‘iladi. Umuman olganda, mazkur dastur yoshlarning kelajakdagi hayotini barqaror qurishi, iqtisodiyotning raqobatbardoshligini oshirishi va jamiyatda faol, bilimli hamda mas’uliyatli avlodni shakllantirishda muhim o‘rin egallaydi.